Nato-aðalskrivarin, Jens Stoltenberg, er komin til ukrainska høvuðsstaðin, Kyiv. Hann hevur ikki verið í Kyiv, eftir at Russland leyp á Ukraina hin 24. februar í fjør.
Vitjanin varð ikki fráboðað frammanundan.
Almenningurin fekk at vita um vitjanina, tá eitt tíðindafólk hjá blaðnum, Kyiv Independent, avmyndaði Nato-aðalskrivaran undir einari heiðursløtu fyri falnum ukrainskum hermonnum.
- Rættarliga plássið hjá Ukraina er í Nato. Vit standa saman við Ukraina í dag og í morgin, segði Jens Stoltenberg á einum tíðindafundi í høvuðsstaðnum, Kyiv.
Ukrainski forsetin, Volodymyr Zelenskyj, var eisini hjástaddur undir tíðindafundinum, og her segði hann, at Nato-toppfundurin í Vilnius í juli kann gerast søguligur.
Nato-aðalskrivarin vissaði um, at Nato-limaskapur og trygdarváttanir til Ukraina fara at standa frammarlaga á listanum á toppfundinum.
Ukrainski forsetin segði, at landið ein dag verður ein partur av Nato, og hann helt onga orsøk vera til ikki at bjóða Ukraina í Nato.
