-Við hesum fíggjarlógaruppskoti skuldi rekast ein ekspansivur fíggjar- og búskaparpolitikkur. Onkursvegna virka orðini sum ein umbering fyri ein skattalætta, sum eingin hevur biðið um og tíðansheldur spurt eftir, og sum bara gagnar vælbjargaðum føroyingum.
Í viðmerkingunum til uppskotið hjá meirlutanum í fíggjarnevndini finst minnilutin, Karsten Hansen, Páll á Reynatúgvu og Kári P. Højgaard, hvassliga at ætlaða skattalættanum hjá samgonguni.
Minnilutin heldur, at tað snøgt sagt ikki hongur saman at hava eitt stórt hall á fíggjarlógini, og síðani at vaksa um hallið við at minka um inntøkurnar hjá landskassanum við einum skattalætta.
Við einum ætlaðum halli hjá samgonguni á fíggjarlógini í 2004 og 2005 á í alt 450-500 mió. krónur, heldur minnilutin ikki tað er ábyrgdarfult at lækka skattin við 60 mió. krónum í 2005. Minnilutin vísir eisini á, at skattalættin hjá samgonguni ikki fer at seta ferð á búskapin, men hinvegin at seta ferðina niður.
-Skattalættin hjá samgonguni virkar ikki ekspansivt upp á krónurenslið í føroyska samfelagnum. Hann virkar fíggjardepressivt, tí at so fáa ágóðan av honum, og serliga tí, at hann hjá fólki flest kennist ábyrgdarleysur, nú tá samgongan frammanundan hevur reyð tøl á botnlinjuni upp á fjóðringsmilliard áðrenn avdráttir, stendur skrivað í viðmerkingunum.
Skattahækking
Í viðmerkingunum til álitið hjá fíggjarnevndini rør minnilutin eisini fram undir, at nú tað er komið undan kavi, at fleiri kommunur nýta høvið til at hækka skattaprosentið, verður úrslitið hjá av ætlaða skattalættanum hjá samgonguni ein reell skattahækking hjá verkafólki.
-Tær hægru inntøkurnar verða loftaðar av 50 prosents markinum, meðan láginntøkurnar gjalda fyri lækkingina hjá háinntøkunum. Áleið 13.000 lønmóttakarar kenna at kalla ongan ágóða av uppskotinum. Málið er sambært viðmerkingunum, at lønin ikki verður etin upp av harðari skatting, Tá ið so samgongan tekur allan peningin inn aftur við avgjøldum, er tað í andsøgn við endamálið við uppskotinum, heldur minnilutin í fíggjarnevndini.
Fakta: Tilmælini frá minnilutanum
1) At strika skattalættan tey komandi fýra árini
2) Í samráð við arbeiðsmarknaðin at umskipa barsilsskipanina til eina arbeiðsmarknaðarskipan burturav
3) At einskilja hesar av almennu fyritøkunum: Føroya Banka, Føroya Tele, Føroya Fiskavirking, Atlantsflog, Realin, Húsalánsgrunnin, og at nýta søluvirðið til at niðurgjalda almennu skuldina, við møguleika fyri at lækka heildarveitingina.
4) At fáa landsstýrisfólkini at halda lógarásettu fíggjarheimildirnar, bæði tá tá ið um rakstur og lógarbundna játtan ræður
5) At umskipa framtaksgrunnin til ein váðafúsan grunn, hvørs endamál skal vera at menna gransking og nýskapandi vinnuhugsan
