Landssjúkrahúsið hevur ov fáar sjúkrarøktarfrøðingar til at ansa børnum, sum eru fødd ov tíðliga, og tey verða tí oftari send til Danmarkar nú enn fyrr -Tað er óheppið, tí ein ávísur vandi er við at flyta børn, sum eru illa fyri, sigur Fróði Joensen, barnalækni á Landssjúkrahúsinum, við útvarpið hjá Kringvarpinum.
Umleið 35 børn verða fødd ov tíðliga í Føroyum um árið, og eisini hendir tað ofta, at nýføðingar verða brádliga sjúkir. Flestu børnini hava higartil kunnað fingið ta røkt og viðgerð, tey hava tørv á, á Landssjúkrahúsinum, tí føðideildin hevur havt serkønar sjúkrarøktarfrøðingar.
Men soleiðis er ikki longur. Tey seinastu trý árini er talið á sjúkrarøktarfrøðingum á føðideildini minkað úr 16, sum allir høvdu serligan førleika at ansa sjúkum nýføðingum, niður í 10, og harav hava bert seks neyðuga serkunnleikan. Tað hevur gjørt, at fleiri ov tíðliga fødd børn og sjúkir nýføðingar verða sendir til Danmarkar at fáa viðgerð, sigur Kringvarpið.
