Fríggjakvøldið 13. verður ein serlig gotisk sýning, sum byrjar kl. 22.00 og endar kl. 01.13.
So er ein djarvur, so er henda serliga sýning á nátt um djevulskap kanska akkurát tað. Eitt fríggjakvøld og tann 13!
Um leikin:
Sjónleikurin Ó - Søgur um djevulskap
Eftir Daniel Wedel
Leikur, bygdur á skaldsøguna eftir Carl Jóhan Jensen
Hvør drap Bænadikt Chonradsen, slaktaran í Gásadali? Hvør ér í grundini Matthias J. Danielsen? Trúboði? Djevul? Hvør ber í grundini djevulskapin í sær?
Hon er nógv umtalað. Hon er elskað. Hon er útskeldað. Hon er útseld. Hon er virðislønt. Hon er Óendalig. Hon er Ógloymandi! Bókin! Las tú hana nakrantíð? Nei? Tað bilar onki. Tí nú er sjónleikurin her.
Sjónleikurin, sum byggir á fyndugu, djúpu og djevulskt spennandi skaldsøguna Ó, søgur um djevulskap.
Demonar, ræðsla, blóð, andar, dráp, veitsluborðhald, girnd, tráan, longsul, níðingssverk, líkskoðan… tað drýpur, og tað spøkir í hesi blóðugu morðgátu, sum avhylur tað allardøkkasta í mannasinninum. Tá ið sálin verður hertikin av djevlinum og fremur hansara andstyggiligastu gerðir.
Vit bjóða tær vælkomnum til eitt Ó–gloymandi kvøld í Norðurlandahúsinum, har tú kemur við á ferð í tíð og rúmd og djúpt inn í skýmaskotini í hesi Ó–loystu morðgátu.
Dreymatoymi
TVAZZ hevur savnað eitt dreymatoymi av leiklistafólki úr Føroyum, Íslandi, Noregi, Svøríki og Danmark, sum gleða seg Ómetaliga nógv til at bjóða tær hesa Ógloymandi morðgátu.
Dramatikari: Daniel Wedel
Leikstjórn: Egill Heiðar Anton Pálsson
Framleiðsluleiðari: Durita Sumberg Poulsen og Gunnvá Zachariasen
Pallmynd/búnar: Martin Eriksson
Týðari: Jonhard Mikkelsen
Tónasmiðir: Anna Katrin Øssursdóttir Egilstrøð og Jens Ladekarl Thomsen
Ljós: Súni Joensen
Filmur: Barbara Lervig
Leikarar:
Anna Katrin Øssursdóttir Egilstrøð
Búi Dam
Durita Dahl Andreassen
Frederic Molund
Gunnvá Zachariasen
Hans Tórgarð
Kristina Sørensen Ougaard
