Heimsins kendastu fólk, eisini heimsins bestu fótbóltsspælarar gera nógv fyri, at teir og teirra familjur skulu hava privatfrið.
Kroatiski miðvallarin hjá FC Barcelona, Ivan Rakitic hevur í kroatiskum miðli fortalt um hvussu langt argentinski stórspælarin hjá FC Barcelona, Lionel Messi vil strekkja seg fyri at hava privatfriðin í lagi.
Í samrøðu við kroatiska blaðið "Novilist" greiðir Ivan Rakitic frá: - Eg havi ikki ongar trupuleikar við tey, sum búgva í mínum grannalagi í Barcelona. Men Lionel Messi fekk trupuleikar, tá hann keypti eini hús í Castelldefels í Barcelona. Grannarnir larmaðu rættiliga illa, so Lionel Messi sá ikki nakran annan útveg enn at keypa húsini hjá grannunum, fortelur Ivan Rakitic við einum stórum smíli.
Í samrøðuni undirstrikar Ivan Rakitic, at hann, Luis Suarez og Lionel Messi eru akkurát sum øll onnur, tá teir halda føðingardagar: - Tað gongur friðaliga fyri seg, og ein hevur eina gávu við júst sum øll onnur vanlig fólk, undirstrikar Ivan Rakitic í samrøðuni við "Novilist".
