Dalibor Sivic er søga í HB, har Jákup Martin Joensen undan vikuskiftinum tók ábyrgdina á seg.
Í dag vóru Jákup Martin Joensen og HB í Sørvági, og tað gekk væl. HB er á veg suður aftur í høvuðsstaðin við 3-1 sigri. Adrian Justinussen staðfesti sigurin 10 minuttir undan leikloki, tá ið hann við frísparki eitt vet úr høgru og tveir metrar frammanfyri brotsteigin sendi bóltin omanfyri manngarðin og dygst inn við nærra stólpa.
Vágamenn vóru misnøgdir við frísparkið, sum var dømt, eftir at Hanus Sørensen hevði sneitt seg framvið tveimum mótstøðumonnum og trillaði bóltin framvið málverjanum. Bólturin hevði kós í málið, men ein av verjuspælarunum bjargaði á málstrikuni, og so bríkslaði dómarin fyri HB frísparki, sum endaði við 3-1.
20 minuttir undan leikloki átti Adrian Justinussen uppleggið, tá ið HB miðvallarin Emil Berger legði HB á odda 2-1.
Mikkel Dahl legði HB á odda 1-0, áðrenn tíggju minuttir vóru farnir, og Uros Stojanov javnaði til 1-1, tá ið 20 minuttir vóru farnir.
07 Vestur vísti góðan hugburð, men mistøk í verjuspælinum kostaðu nógv. Heimaliðið vann 11 hornaspørk, og væl mannaða HB vann fýra hornaspørk. Liðini høvdu umleið eins nógvar royndir ímóti málinum. At Jasper Van Der Heyden 20 minuttir undan leikloki noyddist av vøllinum, var smeitur fyri 07 Vestur.
Hjá HB var tað hugaligt, at Tróndur Jensen, sum hevur verið skaddur í eitt ár, fram ímóti dystarenda varð skiftur inn.
