- Fólk á Oyri og Oyrarbakka verða biðin um at halda seg innandura fyri trygdina skyld.
Á heimasíðuni hjá Sunda kommunu verður sagt, at hørðu hvirlurnar hava havt við sær, at ein tekja er við at ríva seg leysa.
Tí verður í løtuni heitt á fólk á Oyri og Oyrarbakka um at halda seg innandura.
- Her er kolandi stormur og heitt verður á fólk um ikki at fara út. Hetta er serliga galdandi fyri fólk, sum búgva norðanfyri bátahylin á Oyrarbakka.
Tað sigur átaksleiðarin í Sunda kommunu, Magnus Madsen, við KvF í løtuni.
Hann leggur aftat, at soleiðis, sum veðrið er í løtuni, er ikki ráðiligt at taka sær av tekjuni, sum er við at ríva.
