Manchester United hevur í morgun sett Ole Gunnar Solskjær til høvuðsvenjara restina av kappingarárinum.
Mong minnast brøgdini hjá norðmanninum í reyðu troyggjuni. Hann skoraði 126 mál í 366 dystum, tey árini hann spældi fyri felagið, frá 1997 til 2006. Minniligast mann vera sigursmálið í Champions League-finaluni í 1999, móti Bayern München.
Í 2008 bleiv hann venjari hjá eykaliðnum hjá felagnum, men stutt seinni fór hann til Molde. Har vann hann tvey meistaraheitið á rað, áðrenn boð vóru eftir honum í Cardiff í januar 2014.
Í Onglandi gekk minni væl og steðgurin gjørdist tí bara átta mánaðir, áðrenn leiðin lá heimaftur til Molde.
Hann tekur við starvinum í Manchester beinanvegin og fær Mike Phelan afturat sær sum hjálparvenjara, meðan leiðslan fer at leita eftir eini varandi loysn, skrivar heimasíðan hjá felagnum.
- Manchester United er í mínum hjarta og tað er fantastiskt at vera komin aftur í hesum leiklutinum. Eg gleði meg at arbeiða við talentfulla hópinum, starvsfólkunum og øllum í felagnum, sigur Ole Gunnar Solskjær við heimasíðuna hjá felagnum.
