Í Føroyum skulu vit hava álit á hvørjum øðrum og løgreglan skal ikki loynilurta eftir fólki.
Tað halda Sosialistisk Ung í Føroyum.
Sosialistisk Ung er ungmannafelagið hjá Javnaðarflokkinum og tey taka ikki undir við ætlanini um at geva løgregluni í Føroyum heimild til at loynilurta eftir fólki.
- Hetta er at gera seg inn á persónliga frælsið og tað er eitt óneyðugt tiltak, siga tey.
- Vit halda ikki, at tað er gott fyri eitt samfelag, sum átti at bygt á álit, frælsi og samhaldsfesti, at geva einum stovni so stórt vald.
- Vit eiga at hava álit hvør á øðrum, og lurta, eftir heldur enn at loynilurta eftir fólki.
Tey sosialistisku ungu staðfesta, at vit eru ikki ein tjóð, sum hevur nógv brotsverk ella ovurstórar rúsevnistrupulleikar at dragast við.
- Vit eru ein tjóð, har ein av trupulleikunum hjá løgregluni fyri ikki so langari tíð síðani var, at tað er so dýrt at hava fongsul í Føroyum, tí vit hava næstan eingi brotsfólk at seta í fongslið.
- Sleppur løgreglan at loynilurta eftir fólki, eru tað ein hópur av ósekum fólki, sum blíva rakt, og álitið millum fólkið og tað almenna, minkar.
- Hvør vil hava, at grannin, sum av tilvild er løgreglufólk, hoyrir eina samrøðu, tú hevur í trúnaði við ein, sum er undir illgruna fyri eitt brotsverk, uttan at tú veitst av tí, spyrja tey.
Tey halda, at í Føroyum skulu vit hava álit á hvør øðrum.
- Løgreglan skal heldur brúka tíð og pening upp á at byggja sambond og álit millum seg og fólkið, so at fólk boða teimum frá, um nakað ólógligt fer fram.
- Vit eru ikki Danmark, Bretland ella USA. Vit eru nógv minni, og av tí sama er loynilurting í Føroyum so nógv meira nærgangandi enn í Bretlandi, og spurningurin “hvør eygleiðir eygleiðaran” er nógv meira viðkomandi.
- Vit hava ikki brúk fyri hasum møguleikanum og vit hava ikki hug til at koma í eina Snowden líknandi gølu um nøkur ár. Vit kunnu koma so nógv longri við áliti og samstarvi, siga Sosialistisk ung.
