Eitt slysálop á alla ta føroysku fullveldisrørsluna

Høgni Hoydal


Nýggjársrøðan hjá løgmanni var sum tað nógva av fýr­verk­inum á nýggjárinum: Ein roynd at senda eitt sindur av glitri upp í loft, eitt sindur av royktámi og eitt sindur av físi. Tað kostar nógv, men aftanfyri er onki, og tað fellur skjótt til jarðar.
Haldi, at løgmaður mis­nýtir nýggjársrøðuna til at gera politiska propaganda fyri einum landsstýri, sum ongan politikk hevur og sum hevur sent neyðrakettir út alt undanfarna árið.


Tolsemi og samfe­lag­ið fyri øll?
Løg­mað­ur tosaði væl um mill­­um ann­að um tol­semi, fjøl­broytni og eitt sam­felag fyri øll. Men hans­ara egna lands­stýri hev­ur rikið útlendingar av landinum og økir við sín­­um fíggjarpolitikki og skatta­­politikki stættarmunin í Før­oyum hvønn dag.
Vit hava jú eitt landsstýri, sum tekur frá teimum fá­­tæku og gevur teimum ríku. Uppá tvey ár, hava teir brúkt alt tað, sum vit spardu upp undanfarnu árini  og brúkt tað til tey, sum frammanundan hava mest.
 
Læntir fjaðrar
Løgmaður vísir á nøkur posi­tiv viðurskifti í búskapinum og í samfelagnum. Men tað positiva, sum hann tek­ur fram, er alt framt av ein­um vinnulívi, sum hevur stríðst fyri at standa á egn­um beinum, hóast hetta landsstýrið hevur verið væl á veg aftur í studningspolitkkin. Harafturat eru tey almennu tiltøkini, sum løgmaður tek­ur fram, øll framd í und­anfarna landsstýri: Nýggi Smyril, útbyggingar í land­inum, íslandssáttmáli og eitt blómandi mentanarlív.
Hetta landsstýrið hevur ikki framt nakað nýtt tiltak. Tað hevur tvørturímóti steðgað skúlabygging, skert mentan og gransking  og so seint sum fyri tveimum vikum síðani atkvøddi samgongan hjá løgmanni ímóti øktum játtanum til musikksskúlan, tjóðpallin, mentanargrunnin og gransking.

Torvmold í eyguni
Løgmaður kann ikki vísa á nakað mál, sum hetta lands­stýrið hevur framt. Men hann roynir framvegis at kasta torvmold í eyguni á fólki við at tosa um yvirtøkulógir og uttanríkispolitiskar heim­ildir  hóast tað er greitt, at hes­ar lóg­ir hava skumpað okk­um langt aft­ur­um heimastýrislógina.
Tildømis vita vit, at Ís­lands­sáttmálin hevði ong­an­tíð verið framdur, um hann ikki varð gjørdur áðrenn hendan sonevnda uttanríkispolitiska heimildarlógin kom í gildi.
Vit vita, at alt tos hjá løg­­­manni um EFTA og al­­tjóða­­gerð í dag verður forð­­að av júst hesum sam­bands­lógunum, sum vórðu skrumbl­aðar ígjøgnum løg­tingið á miðjari nátt.

Kongeriget Danmark
for så vidt angår
Færøerne til ST
Og so kom løgmaður við eini nýggjheit, sum má metast sum eitt tað størsta álopið á føroysku fullveldisrørsluna í nýggjari tíð: Hann boðar frá, at hendan sonevnda utt­an­ríkispolitiska lógin nú er fráboðað ST.
Tað merkir, at løgmaður hevur góðtikið, at danska stjórnin hevur boðað altjóða samfelagnum frá, at vit eru Kongeriget Danmark for så vidt angår Færøerne  at vit bert eru húskallar og fulltrúar hjá Danmark. At vit ikki kunnu gera avtalur við onnur lond, um tað gongur ímóti donskum áhugamálum  og at Danmark hevur evsta valdið yvir øllum føroyskum viðurskiftum við umheimin
Hetta er hent uttan at Før­oya fólk er spurt ella nakar veit, hvat gongur fyri seg. Og so dittar løgmaður sær at sita og fortelja Føroya fólki at okkara sjálvsavgerðarrættur er staðfestur.
Nakað munnu tey flenna niðri í forsætisráðnum í dag. Danska stjórnin hevur fingið júst tað, sum hon hevur ynskt eftir, og so fær hon ein føroyskan løgmann til at sita og gleðast um tað í eina nýggjársrøðu
Løgmansrøðan sigur okk­um so mikið, at 2006 eigur at gerast árið, har føroyska fullveldisrørslan ger upp við sambandspolitikkin hjá løgmanni og ikki let­ur seg rura í svøvn av fýr­verki, royki og físum.