Staturin Pennsylvania er eftir øllum at døma farin til Barack Obama, og hetta er ein dyggur smeitur fyri McCain. Nú fleiri valstøð í amerikanska valinum eru uppgjørd veksur munurin millum tey bæði forsetavalevnini. Barack Obama hevur nú fingið 175 valmenn og John McCain 76. Fyri at gerast forseti er tørvur á 270 valmonnum. Staturin Pennsylvania fer eftir øllum at døma til Obama, og tað kemur republikanarunum sera illa við, tí ein sigur í hesum statinum er rættiliga týdningarmikil fyri, at McCain kann vinna valið.
Stórur spenningur er í løtuni um, hvør vinnur statir sum Ohio og Florida. Her er Obama á odda, men bert fá prosent eru upptald. Republikanararnir hava ongantíð vunnið eitt forsetaval uttan eisini at vinna í Ohio.
Val er eisini til senatið. Har vísir tað seg eisini, at demokratarnir vinna fleiri sessir. Republikanski senatorurin Elisabeth Dole í Pennsylvania hevur tapt til Key Hagan úr demokratiska flokkinum. Hetta er ein dyggur smeitur fyri republikanararnar. Okkurt bendir á, at demokratarnir kunnu vinna meiriluta í senatinum. Higartil hava teir vunnið fýra sessir frá republikanarunum.
