Erlendur Patursson var tingmaður til tað síðsta, hann doyði brádliga hendan dagin. Hann var fyrstu ferð valdur á ting fyri Tjóðveldisflokkin í Sandoyar valdømi í 1954. Afturvaldur í 1958 og í 1962, men fall í 1966, tá Fólkaflokkurin við Demmusi Hentze vann sessin frá Tjóðveldisflokkinum.
Erlendur Patursson varð afturvaldur í 1970 í Suðurstreymoyar valdømi við methøgum atkvøðutali – oman fyri 800 – og sat á tingi til hann doyði. Erlendur var úr Kirkjubø, sonur Jóannes Patursson og Guðny. Hann tók studentsprógv í Íslandi í 1933. Hann tók 1. part av búfrøðislestri í Oslo og fullfíggjað cand. polit prógv í Danmark í 1942.
Heimafturkomin til Føroya eftir stríðslok var hann fíggjarligi ráðgevi løgtingsins 1946-1947, eitt skifti fiskimaður og í 1953 varð hann valdur til formann í Føroya Fiskimannafelag.
Hann var við til at stovnseta Tjóðveldisflokkin og gjørdist í apríl 1949 blaðstjóri á málgagni floksins 14. September. Hann var landsstýrismaður í sjálvstýrislandsstýrinum 1963-1966 og føroyskur fólkatingsmaður 1973-1977.
Tá Erlendur Patursson doyði, tók Hans Jacob Debes sæti sum tingmaður fyri hann, og Heini O. Heinesen gjørdist floksformaður.
