- Hevur landsstýrismaðurin í fiskivinnumálum ætlanir um at seta vindmátarar/veðurstøðir upp á leiðum, har sum skip og bátar vanliga sigla til og frá fiskiskapi?
Tann spurningin skal Høgni Hoydal, landsstýrismaður í fiskivinnumálum, svara, aftaná at Elsebeth Mercedis Gunnleygsdóttur hevur sett honum ein § 52a fyrispurning um málið.
Tingkvinnan vísir í viðmerkingunum til fyrispurningin á, at 27 veðurstøðir eru á landsvegakervinum, ið regluliga veita dagførdar upplýsingar um ætt, vindstyrki, hita, hálku og avfall.
Hon saknar tó eitt slíkt tilboð til teirra, ið dagliga starvast á sjónum.
- Tey, sum hava sjógvin til sítt dagliga arbeiðspláss, fiski- og útróðrarmenn, hava ikki henda møguleika at fara inn á nakra heimasíðu at síggja, hvussu veðrið er á teimum leiðum, har teir skulu sigla út á fiskimiðini at troyta havsins ríkidømi og at fáa sær sína inntøku og vinna landinum útflutningsvirði.
Nakrar veðurstøðir eru longu, ið fiski- og útróðrarmenn fáa gagn av, men sambært tingkvinnuni, so ynskja teir fleiri.
- Útróðrarmenn kundu hugsað sær, umframt verandi veðurstøðir, at veðurstøðir verða settar á Kallinum á Kallsoynni, á Mýlingi á Streymoynni, á Trøllhøvda í Sandoy, á Ørnanýpuni í Suðuroy. Vindmátarin í Fugloy átti at verið fluttur soleiðis, at hann segði frá tí vindi, sum er; nú vísir hann altíð minni vind, helst tí at hann stendur í lívd.
