Andstøðuleiðarin í Venezuela, María Corina Machado, sum hevur fingið friðarheiðursløn Nobels, kemur ikki til hátíðarhaldið í dag, har virðislønin alment verður handað.
Tað sigur stjórin á Nobelstovninum, Kristian Harpviken, við NRK.
– Hon er tíverri ikki í Noregi nú, og hon verður ikki á pallinum í Oslo Ráðhúsinum kl 13 í dag, sigur Harpviken við norskar miðlar.
Dóttir Machado fær virðislønina í staðin, sigur hann. Hon fer eisini at halda røðu, sum mamma hennara hevur skrivað, skrivar NRK.
Tíðindafundur við friðarheiðurslønarvinnaran var upprunaliga ætlaður seinnapartin í gjár, men hann varð avlýstur við stuttari freist.
Kristian Harpviken segði um vikuskiftið við NRK, at hann hevur tosað við friðarheiðurslønarvinnaran, og at hon fór at koma til Oslo at luttaka í heiðurslønarhandanini í dag.
Tað er ógreitt, hví Machado ikki kemur til hátíðarhaldið.
Machado, sum hevur búð í tí fjalda síðani 2024, hevur fingið ávaring um, at hon verður mett sum flóttafólk, um hon fer úr Venezuela. Ávaringin kom frá løgmálaráðharranum í Venesuela.
María Corina Machado er kend sum ein av stóru politisku kappingarneytunum og atfinnarunum hjá venesuelanska forsetanum Nicolás Maduro í heimlandinum.
Machado, sum er 58 ára gomul, er leiðari í andstøðuflokkinum Vente Venezuela, sum hevur verið í andstøðu til Maduro, sum hevur stýrt landinum síðani 2013.
Hon fekk noktað rættin at stilla upp sum valevni á forsetavalinum í 2024, sum Maduro vann.
Maduro varð av andstøðuni - og serliga María Corina Machado - ákærdur fyri at hava framt valsvik, tá hann vann forsetavalið í 2024.
Hinvegin hava ST, ES, USA og ein røð av suðuramerikanskum londum funnist at atkvøðuteljingini á valinum.
/Ritzau/
