Býarskipanin hjá kommununi hevur ímyndað sær økið úr Lágabø heim móti Rættará og Skálatrøð í Havn sum savnsøkið, har Westward Ho, Norðlýsið og aðrir søguligir bátar og skip liggja.
Økið fevnir um Müllers Pakkhúsi, Fabrikkina, neystið við Lágukai, Skeiva Pakkhús og Gamla Hospital.
Fyri ferðavinnuna, handilslívið, mentanarlívið, savnsvirksemið, ráðstevnur, oljuvinnuna o. a. virksemið hevur tað stóran týdning, at kommunan er aktivur partur í arbeiðinum at skapa góðar karmar sum mentanarbýur, verður sagt í tilmælinum.
Kommunnustjórin, Jens Marius Poulsen og trivnaðarstjórin, Ingibjørg Berg, mæla til at kommunan ognar sær Skeiva Pakkhús.
Sagt verður í tilmælinum, at ilt er at kapitalisera virðið, ið liggur í økinum og teimum karmum, sum økið longu nú hevur.
Heine Lützen boðar vegna seljararnar frá, at teir eru sinnaðir at selja kommununi Skeiva Pakkhús fyri kr. 12.500.000, um skjótt verður gjørt av.
- Grundað á hetta verður mælt til, at kommunan keypir Skeiva Pakkhús, stendur í tilmælinum.
Fíggjarnevndin hevði fund um málið fríggjadagin: Heðin Mortensen mælir til, at kommunan ognar sær bygningin.
Jan Christiansen og Høgni Mikkelsen mæla frá, at kommunan keypir ognina.
Jógvan Arge og Leivur Hansen taka støðu á býráðsfundinum.
