Nú verður ikki so leingi til filmsáhugað havnarfólk fáa ein møguleika afturat at fara í Biograf.
Tí nú verður arbeitt við at endurreisa biografin í Sjónleikarhúsinum.
Heðin Mortensen, formaður í Havnar Sjónleikarfelag, sigur, at tey hava arbeitt eina tíð við at endurreisa biografin og fyrispurningar eru sendir higar og hagar at vita, hvussu tað er rættast at fara fram.
Men enn er nakað eftir á mál, og Heðin Mortensen dugir í dag ikki at siga nær biografurin verður veruleiki.
Eitt fjølbroytt hús
Hann sigur, at spurningurin um at byrja biografin í sjónleikarhúsinum aftur, hevur tikið seg heilt náttúrliga upp í sambandi við umbyggingina og umleggingina av húsinum.
? Innrætningurin hevur gjørt, at tað hevur verið rættiliga avmarkað, hvat virksemi, tað hevur borið til at havt í húsinum.
? Vit hava havt trappugólv, sum var smíðað fast og stólar, sum vóru bóltaðir í gólvið.
? Tí bar ikki til at hava annað í húsinum enn sjónleik og Biograf.
Og biografurin, hann helt uppat fyrst í áttatiárunum, eins og allir aðrir biografar í Føroyum um tað mundi.
? Men nú hava vit broytt húsið munandi. M.a. er tað upprunaliga, slætta gólvið er gjørt aftur og leysir pallar eru keyptir so at vit kunnu byggja gólvið upp, sum vit vilja.
Heðin Mortensen sigur, at alt hetta var gjørt við tí fyri eyga at skapa eitt mentanarhús við fjølbroyttum møguleikum mitt í Havnini.
Heilt nátúrligt
Í hesum sambandi tók spurningurin seg heilt náttúrliga upp at endurreisa biografin.
? Vit eiga filmstól. Men vit krevja kortini at gera íløgu í nýggja ljóðútgerð og nýtt lørift.
Hann sigur, at tað verður arbeitt við málinum, men enn er ov tíðliga at siga, nær komið er undir land.
Ætla ikki at kappast
Ein biografur er í Havnini frammanundan, men Heðin Mortensen sigur, at ætlanin er ikki at kappast við hann.
? Heldur ætla vit, at biografurin í sjónleikarhúsinum skal vera eitt ískoyti til Havnar Bio.
? Vit ætla nevniliga at vísa eitt øðrvísi slag av filmum enn teir, ið Havnar bio vísir, sigur formaðurin í Havnar Sjónleikarfelag. Sostatt er endamálið við biografinum at geva fólki eitt meiri fjølbroytt biograftilboð, enn tey hava nú.
Millum annað hugsar Heðin Mortensen um barnafilmar.
? Hann heldur, at tað er ein stórur tørvur á at vísa fleiri dygdar barnafilmar, so tað er eitt øki, sum nýggi biografurin heilt upplagt fer at leggja seg á.
Men hann sigur eisini, at annars er ætlanin at vísa stórar, góðar ?skaldsøgufilmar? og filmar av tí meiri ?álvarsliga? slagnum, tí hetta er ein tørvur, sum hann ikki heldur er nøktaður í Føroyum í løtuni.
At tørvur er á einum biografi við hesum slagnum av filmi, ivast formaðurin í Havnar Sjónleikarfelag ikki í. Tí hann sigur, at tey fáa ofta fyrispurningar um at vísa film. Sum er, er bara eitt alternativ til Havnar Bio og tað er Norðurlandahúsið, men tað er nógv upptikið til onnur endamál.
