Bjørt Samuelsen, Jóhannis Joensen og Johan Dahl, sum øll eru limir í formansskapinum á tingi, hava lagt uppskotið fyri tingið, sum ein arbeiðsbólkur hevur gjørt fyri Løgtingið. Men tey hava broytt tilmælið soleiðis, at lønin hjá tingfólki kortini ikki hækkar soleiðis, sum bólkurin mælti til.
– Eg havi mælt til, at vit taka lønarhækkanina burtur úr uppskotinum, tí eg mett ikki, eftir samrøður við flokkarnar á tingi, at undirtøka var fyri hesum partinum, sigur Bjørt Samuelsen, løgtingsforkvinna.
Bólkurin, sum gjørdi tilmælið, mælti til, at lønirnar hjá tingfólki hækkaðu úr 34. lønarflokki hjá tænastumonnum upp í 36. lønarflokk. Tað hevði merkt, at lønin hækkaði úr 46.373,69 krónum um mánaðin upp í 53.058,39 krónur um mánaðin. Tað hevði verið eitt lønarlyft upp á 6.684,70 krónur um mánaðin.
Tilmælingarbólkurin grundaði hesa lønarhækkin við, at hon var ein kompensatión fyri, at tingfólk mistu tænastumannaeftirlønina. Men júst tann »tunaða« tænastumannaeftirlønin hjá tingfólki hevur verið tað, sum fólk hava funnist so nógv. Tí Løgtingið hevur »tunað« tænastumannaeftirlønina soleiðis, at tingfólk fáa fulla pensjón eftitr 16 ár í starvi, meðan øll onnur tænastufólk skulu arbeiða í 37 ár fyri at fáa fulla pensjón.
Verður hetta lógaruppskotið samtykt, so fær einki tingfólk meira burturúr. Tey, sum hava verið 16 ár á tingi, tey missa einki. Øll hini fara at missa í pensjón, og Løgtingið fer í framtíðini at spara milliónir í pensjónsbyrðu til tingfólk.
Fólkafloksumboðið í formansskapinum, Elsebeth Mercedis Gunnleygsdóttir, er ikki við hinum í formansskapinum sum uppskotssetari.
Uppskotið kann lesast her
