Nú er semja ímillum ES og Føroyar um sildina. Tað váttar ES nevndin á síni heimasíðu. Avtalan er gjørd ímillum ES fiskimálaráðharran, Maria Damanaki og Jacob Vestergaard, landsstýrismann í fiskivinnumálum. Jacob Vestergaard hevur sagt í Kvf, at semja er ímillum partarnar og nú verður tað so eisini váttað í ES.
Eftir avtaluni halda føroyingar uppat við tí, ES kallar ovurfiskingini av sild og samstundis fer ES nevndin at mæla til, at handilstiltøkini, sum vórðu sett í verk ímóti Føroyum í august í fjør, verða avtikin.
Harafturímóti skulu føroyingar taka altjóða sakarmálini ímóti ES aftur. Samstundis er kunngjørt, at Løgmaður, og Jacob Vestergaard fara í samráð við uttanlandsnevndia hjá løgtinginum nú á miðdegi við tí endamálið at fáa undirtøku fyri avtaluni, sum er gjørd. Einki verður sagt um, hvussu stór, føroyska kvotan av sild verður.
|
