Tað er líkt til, at føroyska ítróttarvikuskiftið fer fram eftir ætlan. Ítróttasamband Føroya hevur ikki fingið nakra útmelding frá Heilsumynduleikunum um annað.
Tað er fyrsta umfar í landskappingini í fótbólti og tað eru avgerandi dystir í bæði hond- og flogbóltskappingini. Kring heimin eru tiltøk sett í verk, sum ávirka ítróttin. Eitt nú avlýsingar og dystir fyri afturlatnum hurðum.
- Vit bíða eftir eini útmelding frá almennu mynduleikunum í Føroyum. Vit hava sent fyrispurning til Heilsumálaráðið. Vit eru í samskifti við sambondini um hetta, men í løtuni hava vit ikki nakra almenna útmelding, sigur Andras Nolsøe, ítróttaráðgevi í ÍSF.
ÍSF hevur sent ein teldupost til tey 26 sersambondini og menningarsambondini, sum eru limir í ÍSF, har tey heita á sambondini um at fylgja øllum almennum vegleiðingum, og meta um tað er neyðugt at gera egnar reglugerðir ella vegleiðingar til kappingarnar um vikuskiftið.
Í Fótbóltssambandinum fyrihalda tey seg til Ítróttasamband Føroya, sum aftur fyriheldur seg til heilsumynduleikarnar. Føroyska manslandsliðið skal 27. mars spæla venjingarlandsdst móti Danmark í Herning. Danska Fótbóltssambandið hevur boðað frá, at tað verða ongir áskoðarar til dystin. Tey gott seks túsund, sum hava keypt atgongumerki fáa pengarnar aftur.
Kristin Dam Ziska, varaaðalstjóri í Fótbóltssambandinum, sigur í stuttari viðmerking til In.fo, at fyribils er støðan tann at dystirnir um vikuskiftið verða spældir sum vanligt. Hartil verður mett, at venjingarlandsdysturin í Danmark verður spældur, men tað verður bara uttan áskoðarar, sum DBU hevur boðað frá.
