Eitt ísraelskt álop á eina palestinska flóttafólkalegu á Vestara áarbakka hevur kosta í minsta lagi seks fólkum lívið.
Tað upplýsa palestinsku heilsumyndugleikarnir í morgun.
Fleiri onnur eru særd.
Ísrael hevur hersett Vestara áarbakka.
– Seks martýrar eru dripnir av hersetingarvaldinum (Ísrael, red.), og fleiri álvarsliga særd eru flutt til Thabet Thabet-stjórnarsjúkrahúsið í Tulkarem, hevur ráðið upplýst í stuttum boðum.
Sambært palestinsku tíiðindastovuni Wafa eru seks persónar dripnir av ísraelskum loftálopum á flóttafólkaleguna Nur Shams, sum er nærindis býnum Tulkarem.
Ísraelskir hermenn eru eisini sendir til Tulkarem.
Ísraelski herurin hevur ikki viðmerkt tíðindini um álopið.
Ísrael hevur hersett Vestara áarbakka síðani seksdagakríggið í 1967. Økið hýsir umframt palestinum umleið eini hálvari millión jødum, sum búgva í búsetingum, sum altjóða samfelagið metir sum ólógligar.
Ísrael vísir tí aftur og grundgevur fyri teimum við bíbilskum og søguligum bondum til økið.
Síðani Hamas leyp á Ísrael 7. oktober, tá minst 1200 fólk doyðu sambært Ísrael, eru harðskapurin kyknaður aftur á Vestara áarbakka.
Ísraelskar deildir og búsetarar hava dripið fleiri enn 300 fólk, síðani kríggið í Gaza byrjaði, hava palestinsku heilsumyndugleikarnir í Ramallah upplýst.
Sambært Hamas stýrda heilsumálaráðnum í Gaza eru fleiri enn 20.000 fólk deyð. Nógv teirra eru børn, kvinnur og eldri fólk, teirra millum fólk, sum vórðu innløgd á sjúkrahús.
Sløk 55.000 fólk í Gaza eru særd í ótalligu loftálopunum, upplýsti ráðið í gjár.
/ritzau/
