Petra Johnsdóttir Joensen, stjóri á Almannastovuni, greiðir frá, at endamálið vð ráðstevnuni er at fáa varpað ljós vælferðargransking.
Granskingin er býtt upp í tríggjar bólkar, sosialu, heilsu og arbeiðsmarknaðarviðurskiftini í ávíkavist Grønlandi, Íslandi og Føroyum.
? Tað er sera týdningarmikið, at vit kunnu granska hesi øki í Føroyum, sigur Petra Johnsdóttir Joensen.
Hon leggur tó afturat, at hetta ikki er grundað á nakra ítøkiliga sak, sum er komin undan kavi í sambandi við vælferðarsamfelagið.
? Vit hava eitt vælferðarsamfelag í dag, men tað ræður um at fáa lýst tað, sigur hon. Her hugsar hon serliga um, at hyggjast skal at, hvussu vælferðarsamfelagið sær út í dag, hvussu tað mennist og ikki minst, hvar er neyðugt at seta inn.
Petra Johnsdóttir Joensen er púra avgjørd, tá hon verður spurd, um tørvur er á eini slíkari ráðstevnu í Føroyum.
? Ikki minst fyri at síggja, hvussu vit standa okkum í mun til grannasamfeløgini, sigur hon.
Pallborð
Skráin fyri ráðstevnuni býður upp á mangt áhugavert, har viðkomandi persónar fara at tosa um hesi trý samfelagsviðurskiftini, sum hava so stóran týdning í einum vælferðarsamfelagið.
Ráðstevnan byrjar í dag, hósdagin, við at Hans Pauli Strøm, landsstýrismaður, setur hana.
Síðani verða upplegg frá bæði føroyskum og útlendskum fyrilestrarhaldarum. Umleið 50 luttakarar verða við á ráðstevnuni, sum endar í morgin við einum almennum pallborðsfundi, har kjakast verður um tað, sum í høvuðsheitum kemur burtur úr ráðstevnuni sjálvari.
