Frá onkrum eygleiðara varð roknað við, at Jógvan Hansen ikki fór at koma so langt í X-factor kappingini. Ikki tí fyrrverandi Aria-frontmaðurin vantaði røddina ella talentið, men heldur tí hann ikki var íslendingur, varð sagt.
Sigurin í kappingini var tó ein andsøgn til hetta, og sjálvur sigur Jógvan, at hann so ongan tíð hevur kent hetta sum nakran vansa í kappingini.
– Fyri mítt viðkomandi má eg bara siga, at hevði ilt við at taka ta útsøgnina í álvara. Eg havi frá fyrsta degi kent meg sera væl í Íslandi. Eisini í kappingini, har eg ongan tíð havi hoyrt eitt tað einasta skeiva orð um mín uppruna. Um nakað, so er tað heldur øvugt. Íslendingar eru sera gestablíðir, og ert tú føroyingur, so er gestablídni bara enn størri.
- Og so var eg heldur ikki heilt ókendur. Hárfríðkanarstovan, sum eg eigi part av, er millum tær størstu í Reykjavík, so tað eru eisini hampuliga nógv fólk, sum eg havi samband við í gerandisdegnum. Og heldur ikki her havi eg nakran tíð hoyrt eitt ilt orð um, at eg eri føroyingur.
