Serliga margháttligt er tað, at sami flokkur, sum stóð á odda fyri blokkniðurskurðinum í 2002 er trygdin fyri, at Sambandsflokkurin fær hendan meirilutan. Samgongan undir leiðslu Fólkafloksins skar blokkstuðulin við 366 milliónum krónum í óðum verkum –?bara fyri at prógva, at tey meintu nakað við kollsigldu fullveldisætlanina.
Hesin niðurskurður varð samtyktur við minst møguligum meiriluta – og tað vísir, at avgerðin varð gjørd í óðum verkum –?og at samgonguflokkarnir púrt einki gjørdu fyri at tryggja alternativar inntøkumøguleikar. Í hesum hava Sambandsflokkurin og Javnaðarflokkurin grein í sínum kritikki. Men har frá og so til slíka kúvending, sum Fólkaflokkurin og teir smáu fyrrverandi fullveldisflokkarnir gera, tað er sera ótrúverdugt.
Sjálvstýrisflokkurin kann enn sum áður tilpassa seg eina og hvørja samgongu, til høgru ella vinstru, til loysing ella samband. Miðflokkurin hevur verið ringur at rokna út. Karsten Hansen, fyrrverandi tingmaður, tykist í heilum at gloyma, at hann ikki er tjóðvelidsmaður meira. Hann hevur tosað sum tjóðveldismaður í valstríðnum. Jenis av Rana førdi fram í fólkatingsvalstríðnum, at vit eiga 54 milliardir tilgóðar hjá donsku stjórnini – pengar, sum Danmark hevur fingið í leigu frá Nato, sigur hann.
Skilligt er, at fólkaflokkurin vil aftur til valdið. »Framtíðin er borgarlig«, hevur Jørgen Niclasen sagt upp í saman. Taktikkur er sjálvandi uppií, og kunnu vit velja at halda, at Fólkaflokkurin tosar løgmanni eftir munninum fyri at sleppa til valdið.
At etisku viðrini verða bannlýst í slíkari samgongu er eyðsýnt. Miðflokkurin – og miðflokkaveingirnir í Sambandsflokkinum og Fólkaflokkinum fáa sín sigur við at nokta hinum at tosa um samkynd, brennivín og annað – í teirra eygum – ringt.
Men vit hava jú valt eina konservativa borgarliga samgongu. Og vit fáa ta stjórn, vit hava valt. So veljarin hevur einki at klaga um – um bara politikararnir halda síni orð.
Men tað eru løgin signal, sum koma frá samráðingunum. Eitt er, at tey ikki vilja tosa um etisku virðini – ella ikki eru samd um, hvussu tey skulu tosa um tey. Men tá tríggir fullveldisflokkar fara við Sambandsflokkinum niður til Danmarkar at fíggja hallið á okkara fíggjarlóg við at vaksa um hallið á donsku fíggjarlógini, sum frammanundan hevur 96 milliónir í halli – tá fær trúvirðið eitt álvarsligt skot fyri bógvin.
