Um tað so eru landsstýrifólkini hjá Jørgeni, sum ikki hava aktað harraboð, ella um hetta er nýggja mannagongdin í Fólkaflokkinum, nú formaður floksins ikki longur er í landsstýrinum, tað er eitt sindur ógreitt. Men sambært Akseli Johannesen, so varð semja á landsstýrisfundi mánakvøldið um fíggjarkarmin. Jørgen Niclasen er sum kunnugt ikki longur landsstýrismaður – men okkurt bendir á, at Annika Olsen og Jacob Vestergaard ikki drógu somu línu sum Jørgen Niclasen mánakvøldið.
Líkist ikki sørt einari parodi, sum ikki tykist enda. Framvegis er stríðsmálið serskattaskipanir til ávísar bólkar av føroyskum monnum, sum Fólkaflokkurin ikki vil sleppa, og so tilfeingisgjaldið. Vit hava sagt tað fleiri ferðir fyrr, at so leingi Fólkaflokkurin er í samgongu, so verður eingin broyting. Hvørki Sambandsflokkurin er ella Javnaðarflokkurin – og ei heldur Tjóðveldi, tora at gera Fólkaflokkinum ímóti.
Hetta hevur søgan víst. Fólkaflokkurin hevur sitið í samgongu í 17 av teimum seinastu 20 árunum, og hann hevur verið so sterkur, at eingin floksleiðari hevur torað at gjørt honum ímóti: Hvørki Edmund Joensen, Høgni Hoydal ella Jóannes Eidesgaard hava megnað ella torað at sett Fólkaflokkinum stólin fyri hurðina. Tann sterki leiðarin, hjá Fólkaflokkinum var Anfinn Kallsberg. Síðani Jørgen Niclasen tók yvir, hevur hann styrkt seg við at fara úr frá sum landsstýrismaður.
Vit sóu tað í fjør, at tað bar til hjá Fólkaflokkinum at halda seg uttan fyri semjuna um fíggjarkarmin, og søgan endurtekur seg í ár.
Jørgen Niclasen tykist hava sama takið á samgongufeløgunum, sum Anfinn Kallsberg, men hann hevur í ávísan mist takið á sínum egna flokki, sum syndrast.
Sjálvandi skulu vit vísa hógv í búskaparmálum. Men vit spara okkum ikki einans úr fíggjarkreppuni, og tað almenna eigur sjálvandi sína ábyrgd at hava virksemi í gongd í landinum, tí mugu politikarar ikki stara seg blindar upp á eitt hvørvandi hall á fíggjarlógini í 2015.
Aksel V. Johannesen kann nú prógva sítt virði, sum nýggjur floksleiðari. Hann kann prógva, um eisini hann ræðist Fólkaflokkin, tað verður hansara politiska sveinastykki.
