Búskaparfrøðingurin staðfestir, at kommunurnar generelt eru nógv meira afturlatnar enn løgtingið. Við øðrum orðum er truplari hjá fólki at fylgja við í, hvussu kommunuskatturin verður brúktur enn hvussu landsskatturin verður brúktur. Tað kann undra, tá flestu føroyingar gjalda fleiri skattakrónur í kommunukassan enn í landskassan. Kommunala eftirlitið vísir á politiska viljan um víttfevnandi, kommunalt sjálvræði. Landið ger rammulógir, sum kommunurnar skulu arbeiða eftir, sigur deildarstjórin á økinum. Avslappaði hugburðurin hjá kommunala eftirlitinum vekir undran. Hví er tað ikki ein sjálvsagdur lutur, í øðrum lagi eitt krav, at fult gjøgnumskygni er í kommunalu roknskapunum, soleiðis at borgarir hava ein reellan møguleika at fylgja við í, hvat kommunalu skattakrónurnar verða brúktar til.
Eisini staðfestir búskaparfrøðingurin, at kommunurnar ikki eru undir eftirliti av landsgrannskoðanini. Gera vit aftur samanberingina við landskassan, so fær almenningurin á hvørjum ári eina drúgva frágreiðing um, hvussu landsstýri og løgting hevur húsast við skattakrónunum hjá okkum øllum. Men vit fáa ongantíð eina líknandi, fakliga frágreiðing um, hvussu kommunalu skattakrónurnar eru brúktar.
Í blaðnum í dag viðgera vit samtyktu fíggjarætlanina hjá høvuðsstaðnum. Sum forrestin skal endurskoðast eftir nýggjár fyri at finna effektiviseringar og sparingar, sambært býráðnum. Ein fyrrverandi borgarstjóri øtast á almenna raksturin, sum er vaksin við 170 milliónum krónum undir Heðini Mortensen. Jan Christiansen eftirlýsir eina virkna andstøðu og størri opinleika.
Á øðrum økjum hevur Tórshavnar Kommuna ein sera virknan kunningarpolitikk við dagligum tíðindaskrivum um stórt og smátt í kommununi. Men er tað í lagi, at kommunalar skattakrónur verða brúktar til at kunna borgararnar um, at borgarstjórin er til arbeiðis, samstundis sum tað knípur við grundleggjandi kunning um, hvat skattakrónurnar verða brúktar til? Svarið er nei.
