Trígir fjórðingar av fólkinum í Noregi er ímóti, at landið skal fara upp í Evropasamveldið. Tað sæst í einari nýggjari meiningakanning, sum Nationen og Klassekampen hava skipað fyri. Har svara 74,7 prosent av teimum spurdu, at tey eru ímóti ES-limaskapi. Bara 15,2 prosent eru fyri.
Úrslitið víkir ikki so nógv frá øðrum kanningum, sum eru gjørdar í seinastuni, men ein broyting er. Fyrr vóru tað serliga fólk á bygd, kvinnur og tey lágløntu, sum vóru ímóti ES-limaskapi, men nú er meiriluti ímóti í øllum samfelagsbólkum. Eitt nú vísir kanningin, at 71 prosent av teimum, sum forvinna meiri enn eina millión krónur um árið, siga nei til ES-limaskap.
Kanningin vísir eisini, at meiriluti er í øllum teimum politisku flokkunum ímóti ES-limaskapi.
