Norski fiskimálaráðharrin Elisabeth Aspaker í vikuni í Bruxelles á fundi við ES fiskivinnukommiserin Mariu Damanaki. Tað var ósemjan um býtið av makrelkvotuni, sum stóð ovast á dagsskránni.
Felagið Nótaskip vísir til tíðindaskriv hjá norska fiskimálaráðharranum sum sigur, at ES og Noreg eru samd um framhaldandi at samskipa sína samráðingarstrategi.
Elisabeth Aspaker sigur, at hon á fundinum við Damanaki legði ítøkilig uppskot á borðið við tí endamálið at fáa glið á samráðingarnar.
- Elisabeth sigur tó einki um, hvat hetta uppskotið snúði seg um, men kunningardeildin hjá norska fiskimálaráðnum sigur við blaðið Fiskeren, at Noreg og ES umhugsa at samráðast um svartkjaft, makrel og norðhavssild undir einum. Higartil hava samráðingarnar verið um hvørt fiskaslag fyri seg, skrivar felagið Nótaskip.
Lagt verður aftrat, at ábendingar leingj hava verið um, at ES vil hava eina loysn á makrelósemjuni.
- Tað er eitt gott høvi, tí kvotutilmælið hjá ICES fyri 2014 upp á 890.000 tons á leið svarar til veiðina hjá øllum londunum í 2013. Harumframt er tíðarskeiðið hjá Mariu Damanaki sum fiskivinnukommiserur úti í komandi ári.
Í tíðindaskrivinum hjá norska fiskimálaráðharranum frá fundinum í Bruxelles verður sagt, at ES hevur biðið um, at samráðingarnar millum Noreg og ES um sínámillum fiskiveiðisáttmálan fyri 2014 fyribils verða útsettar.
- Tað er neyvan ivi um, at hetta hevur samband við makrelmálið, sigur felagið Nótaskip.
