Mangan hevur verið drigið fram, at danir hava verið fremstir at skerja fiskiflotan hjá sær, men soleiðis er ikki, sambært norska blaðnum, Kystmagasinet.
Norðmenn hava veruliga skorið talið av fiskiførum niður. Árini millum 2002 og 2011 skóru norðmenn fiskiflotan við 4.391 fiskiførum. Í sama tíðarskeiðið var tann danski fiskiflotin minkaður við 1.029 fiskiførum.
Í prosentum er eisini talan um ein stóran mun. Norðmenn hava skorið sín fiskiflota við heili 41,26 prosentum, meðan tann danska skerjingin av fiskiførum er 29,26 prosent.
Bæði í Noregi og í Danmark hevur mynstrið broytt seg, so nú eru væl færri, men størri og effektivari fiskifør, sum mynda tann danska og norska fiskiflotan.
