Fyri fyrstu ferð nakrantíð hevur ein norsk bjargingartyrla flogið í einum millum norska meginlandið og Jan Mayen, og tað er tískil ein søguligur túrur, sum norska verjan hevur gjørt.
Túrurin hvønn vegin tók næstan fimm tímar.
- Seinasti hálvi tímin fyri "point of no return" er ógvuliga hektiskur, sigur majorurin í norska herinum, Remi Olsen, við Forsvarets Forum.
Tað var mikudagin í hesi vikuni, at SAR Queen-tyrlan gjørdi søguliga túrin á arktisku oynna.
Í hesum økjum fer vanligi flutningurin fram við einum C-130 Hercules-flogfari, sum kann flúgva langt og lenda á grúsbreyt.
Remi Olsen heldur, at túrurin hesaferð úr Bodø á meginlandinum beinleiðis til Jan Mayen er eitt týdningarmikið stig fyri norskt bjargingararbeiði.
SAR Queen-tyrlan fleyg við einum av trimum motorum sløktum fyri at spara brennievni, og hetta minkaði um nýtsluna av brennievni á longu ferðini við 10 prosentum um tíman.
Túrurin av Jan Mayen og heimaftur til Bodø var 1024 kilometrar langur, og hann tók fýra tímar og 40 minuttir, veit Høvuðsbjargingartænastan í Norðurnoregi at siga.
Remi Olsen sigur, at ein slíkur túrur kann ikki gerast í einari handavend, tí hann krevur neyva fyrireiking.
Hann vísir á, at túrurin hesaferð vísir, at slík flúgving við tyrlu letur seg gera, um onkur skal flytast av oynni av heilsuávum - ella, um talan er um bjargingarátak kring Jan Mayen.
Eingin er fastbúgvandi á Jan Mayen, men Meteorologisk Institut og norska verjan hava manning á oynni, sum hava ábyrgd av flogvøllinum og ymiskum øðrum.
Tað er norska verjan, sum eigur viðheftu mynd.
