Kæran um kommunuvalið á Eiði, sum send varð kommunala eftirlitinum í landsstýrinum, er nú endað aftur hjá tí, sum upprunaliga kærdi málið.
Úrkommunala eftirlitinum í Tinganesi verður sagt, at eftir at kæran, sum send varð landsstýrinum, hevur verið hjá valnevndini á Eiði til ummælis, og er hon nú send kæraranum aftur, so hann kann koma við sínum úttalilsum.
Kommunala eftirlitið upplýsir fyri Sosialinum, at valnevndin á Eiði er komin við upplýsingum, sum ikki fyrr hava verið frammi í málinum. Nú hendan nýggja støðan er íkomin, helt eftirlitið tað vera rætt at senda kæraranum kæruna aftur til ummælis einaferð enn.
Kærarin hevur fingið stutta freist til at koma við sínum ummæli. Og tá tað er komið, sigur kommunala eftirlitið, verður endaliga støða tikin til, hvat henda skal við kæruni, sum send er um kommunuvalið á Eiði.
