Í gjár vóru tvær spreingingar nærindis grøvini hjá Qasem Soleimani í iranska býnum, Kerman. Her vóru nógv fólk savnað at minnast mannin, sum USA beindi fyri.
Qasem Soleimani var fyrrverandi leiðari hjá elituherinum í iransku kollveltingarhirðuni. Hann læt lív í einum amerikanskum dronuálopi í Irak í januar 2020.
Tað var, meðan minningarhald var á staðnum, har hann liggur jarðaður, at tvær spreingingar vóru. Myndugleikarnir í Iran siga, at talan var um eina yvirgangsatsókn.
Seinnapartin í gjár varð sagt, at talið av deyðum eftir atsóknina var 103, men nú siga iransku heilsumyndugleikarnir, at talið av deyðum eftir álopið er 84.
Heilsumálaráðharrin í Iran, Bahram Eynollahi, sigur, at mistakið er, at nøvnini á nøkrum av teimum, sum lótu lív, eru tald tvær ferðir.
- Umframt tey deyðu, er talið av løstaðum í álopinum 284, harav 30 hava fingið álvarsligar løstir, leggur heilsumálaráðharrin aftrat.
Iransku myndugleikarnir siga, at talan var um eina yvirgangsatsókn, men higartil hevur eingin tikið ábyrgdina av atsóknini.
- Dagurin í dag er lýstur av vera syrgidagur í Iran, veit tíðindastovan NTB, sum endurgevur aðrar útlendskar miðlar, at siga í morgun.
##med2##
