Heimskendi skemtileikurin hjá Dario Fo “Vit eiga ikki eitt oyra! Vit lata ikki eitt oyra!” verður at síggja í Sjónleikarhúsinum nú í heyst Leikurin er um stríðið hjá vanliga fólkinum at yvirliva og klára seg við teimum fáu oyrunum tey hava eftir, tá skatturin, bankin, streymurin og oljan, eru farin við sínum.
Í leikinum gera konurnar uppreistur, tá ið prísurin á matvørum enn einaferð fer upp og ístaðin fyri at gjalda tað, tað kostar, gjalda tær tað tað kostaði í gjár, ella í síðstu viku – og summar gjalda enntá slett einki.
- Hesar ólógligu matvørur mugu tó krógvast, fyrst fyri monnunum og síðan fyri politinum, og knappliga eru allar konur í grannalagnum við barn samstundis – og allar í minst níggjunda mánað! Tað sum stendst burturúr, er hvørki meir ella minni enn ein skemtileikur burturav, sigur Havnar Sjónleikarfelag. Hetta er ikki fyrstu ferð, hesin leikur verður spældur í Føroyum,
Hann var eisini sera væl umtóktur tá Gríma spældi hann í 1979, við Eyðun Johannessen og Adelborg Linklett í høvuðsleiklutunum. Hesa ferð verða tað Hjálmar Dam, Ria Tórgarð, Sissal Hjaltalin, Rói Næss og Jákup Dahl ið spæla.
|
