Fyritøkur, sum framleiða vaksinu móti svínakrími, vilja vera frítiknar ábyrgd fyri møgulig hjáárin. Heilivágsídnaðurin hevur kravt, at hann verður frítikin fyri ábyrgd fyri møgulig hjáárin av H1N1-vaksinu.
Orsøkin er, at tað hevur verið eitt hart tíðartrýst at fáa nýggju vaksinuna á marknaðin.
Vanliga er tað ikki loyvt framleiðarum at fáa frítøku fyri ábyrgd, men í hesum føri hevur Danmark eins og onnur lond valt at gera eitt undantak.
Tað sigur danski heilsumálaráðharrin, Jakob Axel Nielsen.
- Fyri sjúklingarnar merkir tað einki, og høvdu vit ikki góðtikið hesar treytir, hevði vaksinan ikki verið komin á marknaðin, leggur hann aftrat.
Bæði Danmark og Noregi fáa sína vaksinu móti svínakrími frá bretska framleiðaranum, GlaxoSmithKline.
