Ísrael tók ímóti Belgia í einasta EM-undankappingardystinum í kvøld, og her eydnaðist gestunum at fara avstað við øllum stigunum og harvið leggja seg á odda í undankappingarbólkinum.
Marouane Fellaini hevur veruliga funnið stevið seinastu mánaðirnar, og hann var maðurin, sum eftir bara níggju minuttum skeyt einasta málið í dystinum.
Belgia hevði takið á dystinum, men seinastu løtuna kom leiðslan í vanda. Vincent Kompany, sum als ikki hevur verið serliga sannførandi hjá Manchester City í ár, fekk seinna gula kortið, men við tíggju monnum eydnaðist tó hjá Belgia at halda fast um leiðsluna.
Belgia og Wales hava nú 11 stig í part í oddinum í bólki B. Ísrael hevr 9 stig.
