- Vit síggja alsamt fleiri e-sigarettir og snús ímillum okkara ungu. Eisini í ítróttaumhvørvunum. Litríkir pakkar og spennandi smakkir og angar, sum minna meira um bomm enn um sera vanabindandi rúsevni, so sum nikotin.
Soleiðis siga tey í Ítróttasambandi Føroya, sum saman við Heilsustýrinum nú fara at skipa fyri ókeypis almennum tiltaki í Auluni í Finsen í Havn.
- Vit vita, at mongdirnar, ið vit innflyta av hesum vørum, eru støðugt veksandi, men spurningurin er, um vit vita, hvussu vandamikið nikotinið í veruleikanum er fyri ein ungan barnaheila.
Og lagt verður aftrat:
- Vit hava ein grundaðan illgruna um, at hvørki vaksin ella børn hava nøktandi vitan um avleiðingarnar av at gerast krøkt/-ur av nikotini á ungum árum.
Tí hava Heilsustýrið og Ítróttasamband Føroya tikið stig til at skipa fyri almennum tiltaki um nikotin og snús í ítróttaumhvørvunum.
- Vit hava fingið vitjan av einum av fremstu granskarunum á økinum, Charlottu Pisinger, og hon fer at hava ein fyrilestur, sum hon kallar: "Tað smakkar av bommi, men oyðileggur barnaheilan."
Málbólkurin eru fólk úr ítróttaumhvørvum, nevndarlimir, venjarar, foreldur og íðkarar, og tiltakið verður í Auluni í Finsens í Havn, mikukvøldið 22. oktober klokkan 19-21.
Skrá:
1. "Innflutningur, rák og snúsvanar millum ung", Snorri Patursson, fólkaheilsusamskipari, Heilsustýrið
2. "Tað smakkar av bommi, men oyðileggur barnaheilan", Charlotta Pisinger, professari í tubbaks- og nikotinfyrbyrging, Center for Klinisk Forskning og Forebyggelse á Bispebjerg-Frederiksberg Universitetshospital.
3. "Hvussu ávirkar nikotin okkara avrik", Signar Hilmarson, ráðgevi í úrvalsítrótti hjá Ítróttasambandi Føroya
4. Spurningar og svar
- Tiltakið er ókeypis, siga Ítróttasamband Føroya og Heilsustýrið
