Nú skal sambandið millum føroyar og londini eystanfyri undir kalda krígnum kannast.
Fyri hálvum ørðum ári síðani fingu vit sokallaðu Svørtubók, sum lýsir hernaðarligu støðu Føroya í sambandi við Danmark og USA undir kalda krígnum.
Men løgmaður vil eisini hava sambandið við londini eystanfyri lýst. Tí hevur hann sett danska professara, Bent Jensen, frá lærda háskúlanum í Odense á uppgávuna.
Arbeiðssetningurin hjá Bent Jensen verður hesin:
1. At lýsa trygdarpolitisku støðu Føroya í kalda krígnum, sum Sovjetsamveldið og tess sameindu (Varsjavasamgongan) mettu hana.
2. At lýsa hernaðarligt virksemi hjá Sovjetsamveldinum og tess sameindu á landi í Føroyum, á føroyskum havleiðum og í føroyskum loftrúmi.
3. At lýsa, í hvønn mun Sovjetsamveldið og tess sameindu høvdu eina serstaka hernaðarliga ætlan (strategi) mótvegis Føroyum, eins og tey eyðvitað høvdu mótvegis Danmark.
4. At lýsa fregnarvirksemið hjá Sovjetsamveldinum og tess sameindu í Føroyum umframt uttanlands Føroyum viðvíkjandi.
5. At lýsa, í hvønn mun føroyingar, føroysk feløg og føroyskir myndugleikar luttóku tilvitað og/ella ótilvitað sum umboðsmenn, njósnarar ella loyniumboð hjá Sovjetsamveldinum og tess sameindu.
6. At savna saman viðkomandi skjalatilfar í skjalasøvnum hjá Sovjetsamveldinum og, um umstøðurnar tala fyri tí, eisini í Eysturtýsklandi og á NATO høvuðsstøðini í Brússel til tess at greiða tann yvirskipaða setningin.
