Í hesum døgum er Brúkaraumboðið vertur fyri norðurlendsku starvsfelagum sínum. Hetta er fyrstu ferð at brúkaraumboðsmenn hittast soleiðis í Føroyum.
Á fundinum verða felagsmál viðgjørd, har hvørt land hevur eina framløgu, har ið støðan á brúkaraøkinum verður lýst.
Millum tey ymisku evnini á skránni er eitt teirra at finna eina felags norðurlendska støðutakan um marknaðarføring umvegis teir sosialu miðlarnir. Eitt annað evni er kappingar á netinum.
- Norðurlendska samstarvið og netverkið hevur stóran týdning fyri føroyska Brúkaraumboðið, vísir Andras Holm Arge á.
Við hesum samstarvinum kann Brúkaraumboðið lættliga fáa atgongd og kunnleika til rættarsiðvenju í ymiskum málum, fyri at fremja góðan marknaðarføringarsið í Føroyum.
Fundurin endar í morgin.
