Fyrsta august var tað stórt vónbrot hjá toftamonnum, tá ið teir noyddust sum av torvheiðum heim aftur úr høvuðsstaðnum. Tá vann næstbesta liðið hjá HB 1-0.
Í góðveðrinum í kvøld var B68 aftur í høvuðsstaðnum. Mótstøðuliðið á Tórsvølli var aftur næstbesta liðið hjá HB.
Nú eru toftamenn á veg til hús aftur við fullari úrtøku. B68 vann 3-1, og sigurin ber við sær, at Øssur Hansen og hansara menn framvegis eru besta boðið upp á liðið, sum fer at flyta beinleiðis upp í bestu deildina.
B68 hevur 31 stig og er nú á triðja plássi – eitt stig frammanfyri HB og 07 Vestur.
Týskvøldið fær B68 vitjan av teimum næstbestu hjá NSÍ. Úrslitið í grannauppgerðini kann fara at vísa seg at fáa heilt stóran týdning fyri, um tað skal eydnast B68 at flyta beinleiðis upp í bestu deildina.
Í 12. minutti var tað miðvallarin Tonni J. Thomsen, sum legði B68 á odda 1-0.
Eitt stórt korter var farið, tá ið Kevin Schindler, hjálparvenjarin, javnaði. Uppleggið átti Rói av Fløtum.
Miðskeiðis í fyrra hálvleiki svaraði B68 aftur. Málskjútti var Andri Benjaminsen eftir upplegg frá Bárði Ó. Jensen.
Ari Johannesen varð skiftur inn beinanvegin eftir steðgin, og hann staðfesti 3-1 B68 sigurin, tá ið seinni hálvleikur var eitt korter gamal.
Tróndur Jensen var á HB liðnum alla tíðina. Øssur Dalbúð var á vøllinum fyrsta tíman.
Týskvøldið fær HB vitjan av KÍ.
