- Í meira enn hálva øld hevur Argenavnið verið óloysiliga knýtt at útvarpinum. Hetta er nú søga, eftir at Jógvan Arge, sum í 40 ár hevur verið ímyndin av føroyskum útvarpi er sagdur úr starvi saman við sjey øðrum starvs feløgum. - Síðsta orðið er ikki sagt, sigur Jógvan Arge.
Hetta stóð skrivað á forsíðuni á Sosialinum 16. desembur í fjør, tá tað kom fram, at Jógvan Arge saman við sjey øðrum varð uppsagdur í Kringvarpi Føroya.
Síðani tá er ymiskt hent í málinum, og í gjár kom staðfestingin, at seinasta orðið ikki var sagt, og uppsøgnin hjá Jógvani Arge er nú ógildað av Mentamálaráðnum.
Nógva uppsagnarløn
Síðan Jógvan Arge varð uppsagdur, hevur hann starvast fyri aðra rás, samstundis, sum hann hevur fingið uppsagnarløn frá Kringvarpinum. Sum sær út nú, er talan blivin um eitt slag av frítíðarløn hesar seinastu seks mánaðirnar, tí nú er Jógvan Arge aftur fastsettur í Kringvarpinum.
Sjálvur veit høvuðspersónurin ikki, hvat nú hendir.
- Eg havi ikki verið í samband við leiðsluna, so nú mugu vit bara síggja, hvat hendir. Sum nú er dugi eg illa at siga, hvat fer at henda, sigur Jógvan Arge.
Ivast í endurgjaldi
Hinvegin veit Jógvan Arge, sambært heimasíðuni hjá Kringvarpinum, ikki, um hann fer at krevja endurgjald frá arbeiðsgevara sínum, nú tað er staðfest, at hann varð uppsagdur av órøttum.
Útvarpsmaðurin segði eisini við heimasíðuna hjá Kringvarpinum í gjár, at hann fegnast, at niðurstøðan hjá Mentamálaráðnum er tann sama, sum hjá honum sjálvum.
Ósaklig uppsøgn
- Mentamálaráðið hevur í kæruviðgerðini kannað eftir, hvørt mannagongdin í sambandi við uppsøgnina hevur verið røtt, harundir hoyringar- og uppsagnarfreist, og um Kringvarp Føroya hevur tikið saklig atlit, tá ið avgerð varð tikin um at siga starvsfólkið úr starvi. Ongin ábending er í skjølunum í málinum, um at onnur grund enn sparing er orsøk til, at starvsfólkið er sagt úr starvi, men sparingin hevði verið størri, um starvsfólkið hevði fingið tilboð um starvið sum journalistur, sum varð lýst leyst stutt undan uppsagnartilgongdini. Harumframt er týðandi málsviðgerðarfeilur gjørdur, sigur Mentamálaráðið í niðurstøðuni.
Tí leggur Mentamálaráðið upp til, at Kringvarp Føroya og Jógvan Arge finna eina loysn á málinum.
Hvørki Rúni Heinesen, stýrisformaður í Kringvarpinum, ella Annika Mittún Jacobsen, kringvarpsstjóri, hava verið at fáa fatur á í dag, men við heimasíðuna hjá Kringvarpinum hava bæði greitt frá, at tey ikki hava viðmerkingar til málið.
