Ukrainski forsetin, Vlodymyr Zelenskyj, sigur í dag, at átakið hjá Ukraina í russiska Kursk-landslutinum er svar upp á óteljandi álop úr júst hesum parti av Russlandi.
- Ukrainski landsluturin, Sumy, sum hevur mark til Russlands, er álopin 2000 ferðir í summar úr russiska Kursk-landslutinum, bæði við rakettum, mortarum og dronum.
Forsetin sigur sambært Reuters, at Kursk-landsluturin tískil hevur fortent eitt rættvíst aftursvar.
Tað var týsdagin í hesi vikuni, at ukrainskar herdeildir tóku seg inn í russiska landslutin, Kursk, og síðan hava bardagar verið millum stríðandi partarnir.
Ukrainski forsetin segði ikki alment fyrr enn í gjár, at ukrainskar herdeildir hava tikið seg inn í russiskt øki.
Sambært útlendskum miðlum hevur Ukraina bæði stríðsvognar og onnur hernaðarakfør umframt nøkur túsund herfólk einar 20 til 30 kilometrar inni í russiskum øki.
Í dag hevur eisini verið sagt, at ukrainski herurin hevur tikið seg inn í russiska Belgorod-landslutin.
Fleiri útlendskir miðlar eru samdir um, at russiski forsetin, Vladimir Putin, er tikin á bóli, og at hann slett ikki hevur væntað, at Ukraina fór at taka seg inn í hesar landslutir.
Lesið eisini -
* Zelenskyj váttar álopini í Russlandi - https://www.in.fo/news-detail/zelenskyj-vattar-alopini-i-russlandi
* 76.000 russar flýddir... https://www.in.fo/news-detail/76000-russar-flyddir-undan-ukrainskum-deildum-i-russlandi
* Putin tikin á bóli - https://www.in.fo/news-detail/serfroedngur-putin-tikin-a-boli
