Tað eru ikki nógv ár síðani, at viðurskiftini millum Ísland og Ongland vóru mest at líkna við tvey lond, ið vóru klár at fara í herna móti hvørjum øðrum. Íslendska fíggjarkreppan rakti Bretland meint, og serliga Icesave-málið gjørdi sítt til, at bretar fingu eitt ilt eyga á íslendingar. Støðan versnaði, tá bretska stjórnin nýtti anti-terrorismulóggávu í eini roynd at frysta alt íslendskt bankavirksemi í Bretlandi.
Nógv vatn er runnið í ánni síðani tá, og viðurskiftini millum londini eru í dag so mikið góð, at bretski forsætisráðharrin, David Cameron, í dag er á almennari vitjan í Íslandi, har handilsviðurskiftir landanna ímillum verða umrødd. Vitjanin hjá Cameron er fyrstu ferð, at ein bretskur forsætisráðharri vitjar Ísland síðani Winston Churchill var á vitjan í 1941.
Eitt av málunum, ið verður umrøtt á fundinum millum stjórnarleiðararnar, er møguleikin fyri at leggja ein 1200 km langan orkukaðal millum Bretland og Ísland, so at bretar kunnu njóta ágóðan av tí bíligu orkuni í Íslandi. Tað skrivar bretska blaðið The Independent.
Ein nevnd hevur fingið eitt hálvt ár at kanna, um verkætlanin letur seg gera.
Eitt líknandi uppskot, um ein kaðal millum Ísland og Føroyar, hevur mangan verið nevn í Føroyum, men enn hevur talan bara verið um tos.
