Lutaseðlar
Tað er helst sagt fleiri ferðir áður, men í HB ætla tey sær ikki, at tað skal fara ósvarað framvið, nú felagið verður 100 ár.
Føðingardagsfløgan er longu komin á marknaðin, og leygardagin fara HB-stuðlarnir so undir sítt stóra átak, og tað er ikki við mýkindum.
Við áskriftini »vinningar fyri 1.000.000« hava stuðlarnir prentað ikki færri enn 20.000 lutaseðlar, og komandi hálva árið verður so roynt at selja allar hesar.
Ein millión eru sjálvandi nógvir pengar, og tá so høvuðsvinningurin á seðlinum eigur so nógv tann størsta partin av puljuni, so verður tað ikki minni spennandi.
Íbúð í Berjabrekku
Talan er nevnliga um eina íbúð í Berjabrekku 3, sum skal lutast burtur. Talan er um smærru íbúðirnar, sum liggja í veghædd og eru 63 fermetrar til støddar. Virði av hesari er 950.000 kr., og soleiðis sum eftirspurningurin eftir bæði íbúðum og grundøkjum er í høvuðsstaðnum, so bera tey í HB-stuðlum als ongan ótta fyri, at tað fer at standa á at selja seðlarar.
- Tað óttast vit so als ikki. Sjálvt um tað kanska kann tykjast eitt sindur ógvusligt, at ein lutaseðil kostar 100 kr., so ivist eg ikki í, at tað verða heilt nógv, sum fara at keypa sær ein ella kanska tveir seðlar hvønn mánað.
Soleiðis sigur Sólbjørn Thomsen, formaður í HB-stuðlum, og hann tykist kanska meira enn nakað lættur, nú tey loksins kunnu fara undir søluna av lutaseðlunum.
- Tað er altíð eitt stórt arbeiði, sum skal gerast, tá slíkt skal fyrireikast. Og við somikið stórum vinningum, hava fyrireikingarnar sjálvsagt ikki verið minni, sigur hann.
Og so kundi kanska verið skoytt afturat, at enn er stríðið so ikki liðugt. Hóast Byggiharrin í Berjabrekku, Høgni Mikkelsen, er svorin HB-viðhaldsmaður, so røkkur hetta ikki somikið langt, sum til at geva felagnum eina ókeypis íbúð at luta burtur.
Við øðrum orðum vil tað siga, at fyrstu 10.000 seðlarnir ella har á leið fara til at gjalda høvuðsvinningin, so tað hvílir framvegis ein stór ábyrgd á teimum, sum skulu selja seðlarnar.
Drigið á føðingardegnum
Leygarmorgunin fara HB-stuðlarnir undir søluna av seðlunum, og verður tað á Torginum í SMS, at hetta verður skotið ígongd.
Vanliga kunnu sølur av lutaseðlum strekkja seg yvir átta vikur, men HB hevur so fingið loyvi at selja í hálvt ár, og í sambandi við sjálvan føðingardagin verður so drigið millum mongu seðlarnar, soleiðis at hepni vinnarin kann finnast.
100 ára dagurin er 17. oktober, og 22. oktober verður vinnarin so funnin. Um hesin so eisini fer at verða við á stóru gallaveitsluni hjá felagnum, sum verður dagin eftir, er ilt at siga, men kanska hevur vinnarin als ikki stundir til nakra veitslu tá. Talan er nevnliga um lyklaklára íbúð, so um innbúgv við meira er keypt, so hevur vinnarin helst úr at gera við flytingini til ta tíð.
