Villeiddir av taltilfarinum

Í tilmæli sínum til fíggjarnevndina um grein 8 í fíggjarlógaruppskotinum, Almanna- og heilsumál, skrivaði minnilutin í Trivnaðarnevndini, Hans Pauli Strøm, Kristian Magnussen og Marjus Dam, at taltilfarið í nógvum førum var villleiðandi og at tað var sera trupult at gera rættar samanberingar millum ymisk konti og millum ymisk ár. Nú vísir tað seg, at minnilutin fær meira rætt í hesum orðum sínum, enn hann sjálvur hevði roknað við. Tí táið minnilutin eftirkannar tølini, vísir tað seg, at tær týdningarmestu upplýsingarnar aftan fyri pástandin um, at tað vanta einar 66 mió. kr. til almanna - og heilsumál í fíggjarlógaruppskotinum, eru beinleiðis villleiðandi. Tað eru yvirlitini frá Fíggjarmálastýrinum (Gjaldstovuni) um nýtsluna higartil í ár, samanborið við játtanina fyri 1999. Í hesum yvirlitunum vísir tað seg at játtanartølini eru nettotøl hjá landskassanum, tvs. at kommunuparturin av játtanini ikki er við. Men í nýtslutølunum higartil í ár eru tølini bruttotøl, tvs. at kommununar partur av útreiðslunum er íroknaður.