Trygdartænastan hjá norsku løgregluni, PST, hevur sent løgmálaráðnum í Oslo tvær loyniligar áheitanir um at broyta týðandi partar av teirri norsku yvirgangslóggávuni.
Sambært blaðnum VG vil trygdartænastan millum annað hava rúmari heimild til at skráseta upplýsingar um einstaklingar. Eitt nú vil tænastan hava rætt til at skráseta haturskend boð á alnótini, tí tað kann sambært tænastuni vera neyðugt fyri at avdúka møguligar yvirgangsætlanir.
Ein talsmaður fyri PST váttar, at tænastan hevur biðið um rúmari heimildir, men hann leggur dent á, at arbeiðið við áheitanini var byrjað áðrenn yvirgangin í Oslo og á Utøya tann 22. juli. Fleiri keldur í Noregi siga, at endamálið hjá PST er júst at avdúka einstaklingar, ið kunnu hugsast at hava yvirgang í huga.
