Heilsufrøðiliga Starvsstovan fer nú undir eina verkætlan, har endamálið er at beina fyri ridluskriða hjá seyði í Føroyum.
Tað skal gerast við at kanna ílegurnar á seyði í einum avmarkaðum øki, har vit vita, at ridluskriði er.
Síðani er ætlanin at fara undir eitt miðvíst kynbótararbeiði í eini roynd at ala okkum burtur úr ridluskriða í Føroyum.
Mett verður, at verkætlanin fer at kosta 879.000 krónur og nú skal Løgtingið viðgera um Heilsufrøðiliga Starvsstovan skal fáa játtan til verkætlanina.
Ridluskriði varð fyrstu ferð ávístur í Føroyum í 1984. Hildið verður, at tað var seyður sum kom úr Skotlandi í 1961, sum hevði borið sjúkuna til Føroyar.
Eftir hetta hava einstakir tilburðir verið, ofta fleiri ár millum tilburðirnar, vísir Jørgen Niclasen, landsstýrismaður í fíggjarmálum á, nú hann hevur biðið Løgtingið um pengar til verkætlanina.
- Í 2012 varð ein tilburður fráboðaður og staðfestur á Skælingshaga norður á Skælingi, men illgruni var um, at onkrir tilburðir afturat høvdu verið í økinum.
Í ár er støðan versnað og hildið verður, at har hava verið umleið 20 tilburðir av ridluskriða. Tríggir av hesum tilburðum eru staðfestir á kanningarstovu, men harumframt er seyður við sjúkeyðkennum sæddur í Skælingshaga suður.
Seyður, sum hevur sjúkutekin verður altíð avlívaður, og helst verður roynd tikin til kanningar.
Av tí, at sera lítið av kanningum eru gjørdar av ridluskriða í Føroyum, vita vit lítið um støðuna.
Men av tí, at ígerðartíðin er sera long, og seyður væl kann ganga við sjúkuni alt lívið uttan at vísa sjúkutekin, eiga vit at rokna við, at munandi fleiri seyðir enn teir, sum verða fráboðaðir, ganga við sjúkuni.
Harafturat kann sjúkan verða flutt ímillum øki og ímillum oyggjar við seyði, sum er frískur smittuberari.
Tí er vandi fyri, at frískir smittuberarar eru nógva staðni í Føroyum.
Nevnast kann tó, at Heilsufrøðiliga starvsstovan er í ferð við at gera kanningar í Stóru Dímun og higartil hava øll úrslit verið negativ.
Ætlanin er at kanna allan seyðin í báðum raktu hagunum á Skælingi og í grannahagunum,Leynahaga, Heygshaga, Oyrareingjarhaga, Bíggjarhagi suður, Sundshaga, innari partur og í Kongshagi úti í haga.
Savnsmynd
