Ein nýggj og eitt sindur øðrvísi barnabók er júst komin út.
Tað eru tær báðar, Monika Stauss Joensen og Kristfríð Tyril, sum hava gjørt nýggju bókina um bamsurnar, Bartal og Bjarna og vinir teirra - og vinirnir eru fýra hvítar mýs.
Hetta er onnur bókin av hesum slag. Hin fyrra, Bartal og Bjarni, kom út í 2015, og varð útseld beinavegin.
Myndirnar í bókini eru fotomyndir og bamsurnar, mýsnar og alt á myndunum er veruligt.
Monika, sum hevur skrivað søguna til bókina og hevur tillagað og samlað tilfar til myndirnar, heldur brosandi fyri:
- Eg eri helst eitt sindur barnslig sjálv, men tað bilar einki, um vit goyma okkurt barnsligt í okkum gjøgnum lívið. Børn hava so nógvar fantastiskar eginleikar, sum vit vaksnu kundu lært nógv av.
Hon vísir á, at bamsurnar í bókini hevur hon keypt sær sum vaksin og hevur átt tær í fleiri ár.
- Mýsnar fann eg nógv seinni í einum IKEA-handli, og hetta var eftir, at hin fyrra barnabókin - Bartal og Bjarni - kom út. Eg setti mær fyri, at sjálvandi skuldu mýsnar við í nýggju søguna í bókini, sum nú er komin.
At gera hugskot ítøkilig
Kristfríð Tyril er fotografur og hevur drúgvar royndir við at taka myndir, bæði portrettmyndir og myndir frá tiltøkum. Hetta er fjórðu ferð, at hon ger bók saman við Moniku Stauss Joensen.
- Fyrstu ferð, vit arbeiddu saman, var til bókina, Lívið - eitt undur, sum kom út í 2012. Síðan gjørdu vit Edelweiss og Sólarkaffi í 2013 - og í 2015 barnabókina, Bartal og Bjarni.
Monika Stauss Joensen er full í hugskotum, og so roynir hon at fanga hugskotini og gera tey ítøkilig.
Soleiðis sigur Kristfríð Tyril um samstarvið við Moniku.
Hugskotið til nýggju barnabókina er nøkur ára gamalt, men tað var ikki fyrr enn í januar í ár, at tær báðar veruliga fóru í gongd.
Bókin er ikki bara ein søga, men hevur ymiskt, sum børnini skulu finna út av, og her eru hugskot til ymiskt kreativt, sum børnini kunnu spæla, bæði í og uttan fyri bókina.
- Vit mugu nevna Sofíu Klæmintsdóttir Jacobsen í Leirvík, sum hevur hjálpt okkum við nógvum praktiskum. Hon hevur seymað, bundið og heklað til bæði bamsurnar og mýsnar, eru Monika og Kristfríð samdar um.
##med2##
Ymiskleiki og kreativitetur
Monika Stauss Joensen og Kristfríð Tyril halda ikki, at bókin hevur ein yvirskipaðan boðskap, men heldur hevur hon nógv ymisk gullkorn, sum tær taka til.
- Søgan snýr seg um tveir beiggjar, sum eru ymiskir, bæði av lyndi og í áhugamálum, og tá vit hugsa um vinir teirra, tær fýra mýsnar - ja, so gerast ymiskleikarnir enn fleiri, siga tær báðar.
Bartal og Bjarni og vinir teirra leggur alla tíðina upp til kreativitet, og aldursbólkurin er børn millum trý og átta ár.
Tey, sum vilja vita meira um nýggju barnabókina, og hvar hon fæst til keyps, eru hjartaliga vælkomin at venda sær til Moniku Stauss Joensen á tlf. 274956.
##med3##
