Jórun Jacobsen og Jórun Biskopstø byrjaðu báðar sítt virkna lív í KÍ, tá børnini byrjaðu at sparka fótbólt. Til kappingar bjóðaði felagið køkur, saft og kaffi.
– Vit vóru tey fyrstu sum bjóðaðu kaffi og køkur til kappingar, og fólk sum komu aðrastaðni frá tosaðu um, hvussu blíðar vit vóru.
Stutt aftaná varð farið undir at umvæla hølini. Tey vóru ein bólkur av eldsálum, sum tapetseraðu, málaðu, og løgdu nýtt gólv. Við góðum karmum ráddi um at skipa fyri onkrum, soleiðis at fólk komu á gátt. Tí fóru tey undir at vísa enskan fótbólt.
– Vit hongdu eitt stórt lak uppá veggin og dýnubetrekk fyri vindeyguni, tí vit høvdu ongar gardinur at draga fyri.
Tá Liverpool ella Manchester United spældu, vóru tey ofta 100 fólk savnað.
– Vit gjørdu kaffi og bakaðu køku. Skundaðu okkum at baka aftaná arbeiði. Alt bar til, tað var stuttligt, og samanhaldið var ótrúliga gott.
Hvønn leygarmorgun møttu tær til kappingar og syrgdu fyri, at alt bleiv væl avgreitt.
– Tað einasta vit ikki gjørdu var at døma.
Hóast hon ikki dømdi sjálv, var Jórun Frimannsdóttir Jacobsen samskipanarleiðari eitt tíðarskeið, og tá ansaði hon eftir, at spælarar dømdu dystir leygardagar.
– Eg gekk úti á vøllinum og skrivaði niður, hvør skuldi døma, og hvør skuldi vinka.
##med2##
Í 2015 bleiv Mikkjal Thomassen venjari, hann setti stór krøv til umstøðurnar á Djúpumýru, og stórar útbyggingar blivu gjørdar.
– Tá bleiv annað lív.
Í kjallaranum vóru hølini gomul og ótíðarhóskandi. Mikkjal Thomassen gjørdi tekningarnar til umklæðingarrúmini og var uppií arbeiðnum.
– Øll vóru við uppá hetta. Fólk sóu at hetta var nakað serligt, og tí bar tað til. Hann fekk fólk við sær.
Jórun Frimannsdóttir Jacobsen og Jórun Biskopstø dáma væl, at skil er í. Tær brúka nógva tíð í felagnum, og tí hevur tað týdning, at viðurskiftini eru væl skipað.
– Tað er irriterandi um tú skalt brúka tíð uppá nakað sum ikki riggar, men tá tú sært at viðurskiftini eru góð, so tímur tú betur.
##med3##
KÍ hevur ment seg nógv seinastu árini og verður í dag rikið sum eitt professionelt felag.
– Fyrr fóru vit runt í handlarnar og spurdu um troyggjur, tí tá vóru eingir pengar. Nú fer man bara oman og bíleggur. Sálin er tó framvegis í felagnum, tí fólk eru ótrúliga góð við KÍ, men tað er uppá ein annan máta nú, tí tað er meira professionelt. Hetta verður rikið sum ein útlendskur klubbur, alt riggar, og hvør kennir sína uppgávu.
##med4##
Fimm stórar vaskikurvar hvørt kvøld
Høvuðsuppgávan hjá teimum báðum Jórun er at vaska klæðir og gera klárt til venjing og dyst, bæði hjá mans- og kvinnuliðnum. Nøgdin á klæðum er blivin nógv størri, enn hon hevur verið, og hon bara veksur. Tær vaska eisini klæðini hjá 1. deildarliðnum, hóast liðið flutti niður í 2. deild síðsta kappingarár, verða klæðini framvegis vaskað, tí umstøðurnar verða ikki broyttar fyri tað um teir spæla í 2. deild.
– Vit hava ivaleyst at gera vit at vaska klæðir. Hvørt kvøld standa fimm stórar kurvar við klæðum at vaska. Tey skulu hava blusir, shorts og hosur. Blusur við longum ermum at hava innanfyri, drakt at hita upp í og heitar jakkar.
##med5##
Tá dystir eru um vikuskiftini eru Jórun Frimannsdóttir Jacobsen og Jórun Biskopstø á loftinum og stákast. Tær gera kaffi og baka køku, tær taka sær av stuðlum, og øðrum sum hittast í KÍ høllini. Dómarar, vaktarmenn, sløkkiliðsmenn, innkrevjarar, miðlafólk, og onnur fáa kaffi.
– Tað eru øðiliga nógv fólk til arbeiðis tá dystir eru.
##med6##
Alt arbeiði, sum Jórun og Jórun gera, er sjálvboðið, og tær vita ikki, hvussu nógva tíð tær brúka á Djúpumýru, men nakrar ferðir um dagin koma tær at koyra í maskinuna og leggja uppá pláss. Tær býrjaðu at vaska klæðir í 1996.
– Í 30 ár hava vit oksað, og tað verður ikki spurt eftir um tað er Summarfestivalur, ólavsøka, ella páskir, vit eru her hvønn dag, men vit eru her, tí vit halda tað vera stuttligt. Okkum nýtist ikki at vera irriteraðar ella móðar av hesum, tí vit kunnu gevast, um vit hava hug, hetta er sjálvboðið arbeiði. Vit gera tað av áhuga og fyri felagið. Vit fáa ikki løn, men vit fáa so nógv annað. Ungdómurin kemur at práta við okkum, og tey eru ótrúliga fitt.
Tað gevur gleði at hjálpa í einum slíkum felagsskapi. Tær hitta nógv fólk, og leikararnir og onnur í felagnum virða arbeiðið, sum Jórun og Jórun gera.
##med7##
Jórun Biskopstø og Jórun Frimannsdóttir Jacobsen eru tær einastu, sum hava verið um KÍ hópin, bæði tá teir vunnu greipuna og 1999, og nú teir aftur vunnu hava í ár.
– Eg havi ofta hugsað tankan, at kanska burdi eg givist, men so hugsi eg, hvat eg so skal gera. Bara seta meg við hús og gløða ella halda fram at vera har, sum eg havi tað gott? Hetta ber til so leingi man er frískur og hevur orku.
Tær vænta ikki, at fleiri koma av teirra slag.
– Eingin tímir at gera hetta fyri onga løn, hetta er tann nýggja tíðin, at øll vilja hava nakað afturfyri.
Tað er lættari at fáa fólk at hjálpa í felagnum, tá tað gongur væl. Tað ræður um at geva nýggju fólkunum smáar uppgávur, sum tey duga og megna, tí tá er lættari at koma uppí, og taka okkurt afturat so hvørt.
##med8##
##med9##
##med10##
##med11##
##med12##
##med13##
##med14##
##med15##
##med16##
##med17##
