Rættiliga óvæntað hevur Barack Obama, forseti, gjørt av at senda 100 amerikanskar hermenn til Uganda at hjálpa stjórnarherinum har at berja niður Harrans Mótstøðuher, sum er ein eirindaleysur uppreistrarbólkur.
-Eg havi givið herleiðsluni loyvi til at senda 100 stríðsbúnar hernaðarráðgevar til Miðafrika fyri at hjálpa teimum, sum virka fyri at beina Joseph Kony burtur, skrivar Obama í brævi til Kongressina.
Joseph Kony (myndin) stendur á odda fyri Harrans Mótstøðuheri, sum er skuldsettur fyri grov brot á mannarættindini so sum dráp, neyðtøkur, burturflytingar og fyri at brúka rænd børn sum hermenn. Bólkurin er virkin har norðuri í Uganda og har suðuri í Sudan.
Í brævinum skrivar Obama, at hóast hermenninir eru stríðsbúnir, skulu teir bara virka sum ráðgevar og ikki taka lut í beinleiðis bardøgum við Harrans Mótastøðuher uttan so, at talan er um sjálvverju.
