Amerikonsku myndugleikarnir siga seg hava fingið fleiri ábendingar um, at pakistanska fregnartænastan ISI hevur eggjað uppreistrarrørsluni Haqqani til at søkja at amerikonskum málum í Afghanistan. Rørslan hevur høvuðssæti í Pakistan.
Eitt nú vísa frágreiðingar hjá amerikonskum fregnartænastum, at tað var eftir beinleiðis boðum frá ISI, at menn hjá Haqqani-rørsluni søktu at fleiri málum í Kabul tann 13. septeber. Keldurnar leggja afturat, at hetta er ikki váttað enn.
Amerikanski verjuovastin, Mike Mullen, hevur kravt, at pakistanska stjórnin tekur stig til at loysa trupulleikarnar við Haqqani-rørsluni. Kravið varð sett fyrr í vikuni, skrivar AFP og leggur afturat, at Haqqani-rørslan verður mett sum ein tann vandamesti uppreistrarfelagsskapurin í Pakistan.
