Løgreglan leitar nú eftir vitnum til eitt harðskapsmál í Havnini leygarnáttina. Ein ungur maður fór í býin fríggjakvøldið, men tá ið hann fór til hús aftur, varð hann álopin.
Hetta var ímillum klokkan trý og fýra leygarnáttina. Hann var á veg út eftir Jóannesar Paturssonargøtu, men tá ið hann kemur út ímóti Vesturkirkjuni, møtir hann fýra øðrum ungum fólkum, sum hann ikki kennur, tveimum dreingjum og tveimum gentum.
Løgreglan sigur, at púra púra ómotiverað lupu tey fýra á hann og bukaður hann av. Hann fekk skaða í andlitið, hann fekk blátt eyga, umframt at hann hevur fingið fleiri aðrar snuddir í andlitið, og so hevur hann eisini brotið eina tonn.
Eftir at hava verið hjá lækna í gjár og staðfest skaðarnar, meldaði hann tilburðin. Í hesum sambandi sóknast løgreglan eftir fólki, sum hava sæð okkurt til álopið, sum altso var ímillum klokkan trý og fýra leygarnáttina, uttarliga í Jóannesar Paturssonargøtu, úti ímóti Vesturkirkjuni.
